لبنان الحلو

١٢ شلال فيكن تسبحوا فيهن ببلاش بلبنان

إيام بيجي على بالنا نجرب شي جديد ونعيش مغامرة مش عاملينا من قبل. شي مرة سبحتوا بشلال أو بحيرة؟ الشعور ما بينوصف لأن بس تحطوا إجريكن وتنزلوا بالمي رح تحسوا حالكن بعالم خيالي. المي بالشلال مسقعة كتير وبتبورد القلب وبتشد الجسم وصوت المي الجارية علاج نفسي. رح نعرفكن اليوم على ١٢ شلالات مطرح ما فيكن تسبحوا وتنتعشوا ببلاش من دون ما تدفعوا دخولية.

١. شلال سرجبال، سرجبال-الشوف

من أجمل الشلالات بلبنان موجود بضيعة سرجبال الحلوة مغمور بالشجر والخضار.


٢. شوان، نهر ابراهيم

بحيرة شوان موجودة بين التلال الخضر على ضفة نهر ابراهيم، مغمورة بشجر الصنوبر والبلوط والأعشاب الخضرا، والسباحة فيها بهيك طقس بترد الروح.

٣. شلال يحشوش، يحشوش-كسروان

شلال يحشوش مع بركتو المخفية من أجمل المناظر الطبيعية بلبنان، أكيد ما فينا نوصف هل جمال بصورة لازم تروحوا وتشوفوا.


٤. شلالات أفقا، كسروان

شلال أفقا لوحة فنية من دون شك، بيتميز بالتراث الفينيقي العريق، مغارة أفقا والشلال بيقولوا كانوا مكان ولادة أدونيس، هل محل كتير حلو للسباحة.


٥. شلالات كفرحلدا، البترون

شلالات كفرحلدا منتزه طبيعي بلبنان بيتدفق فوق نهر الجوز لي بيمرق بضيعة بيت شلالا وكفرحلدا الساحرة والمعروفة بجمال شلالها.


٦. شلالات بقرزلا، بقرزلا-عكار

نهر عرقا بيتميز بالمي الصافية الصالحة للشرب، تخايلوا حالكن عم تسبحوا بهيك محل مناسب لهواة النط والغطس من العالي.

٧. شلال عربصاليم، النبطية

هل شلال مخبى بين الصخور والشجر وبيتميز بموقعو الساحر وبالمي النقية.

٨. شلالات نهر العاصي، الهرمل

نهر العاصي من أجمل الأنهار بلبنان، أكيد فيكن تسبحوا ومش بس هيك فيكن تعملوا كتير نشاطات مائية متل الرافتينغ.

٩. شلال عيون السمك، الضنية

الحلو بهل محل إنو بعيد عن العجقة والضجة، بخليكن تعيشوا خلوة مع الطبيعة.


١٠. شلالات بساتين العصي، البترون

جنة مخفية بالبترون لعشاق السباحة والغطس.


١١. شلالات بسري

بمرج بسري خفايا طبيعية رائعة وشلالات بسري السرية رح تاخدكن على عالم تاني.


١٢. شلال عكار العتيقة، عكار

هل منطقة الساحرة مخباية شلال ساحر بين الصخور مطرح ما المي زرقا نقية بتبورد القلب.

اظهر المزيد

مقالات ذات صلة

زر الذهاب إلى الأعلى

أنت تستخدم إضافة Adblock

يرجى إغلاق Adblocker من أجل المتابعة